港兒童畫家 再奪國際大獎

小畫家劉見之嘅大名，黛安喺佢細細個時已經聽過啦。最近同佢爹哋劉浩昌傾開偈，先知原來12歲嘅劉見之同10歲弟弟劉禹之，加埋博藝堂畫室14歲同門師姐趙芷榆，呢排又喺有「畫壇奧林匹克」之稱嘅第37屆國際青少年蒙馬特現場寫生比賽攞到獎，仲唔止1個，而係9個獎！

劉爸爸話，今次比賽兩兄弟同師姐喺1星期內，創作水彩、炭筆、水墨等不同類型嘅畫作，仲要畫成33幅，非常考功夫，「本身比賽要求13歲以上嘅入圍者，先要即場畫出被列為世界文化遺產嘅古城寫生，今次係破格要求佢哋兩兄弟一齊即場寫生，仲頒咗全球十大青少年畫家嘅榮譽，係成個賽事最細個嘅得獎者﹗」另外，禹之嘅作品《都市天橋》，亦喺第十七屆拉脫維亞聯合國教科文組織國際青少年繪畫比賽中，攞到全場最高榮譽大獎，係首位中國畫家咁後生奪獎，真係揚威海外！