食肆學校齊響應 海洋公園「無飲管運動」

愈來愈多市民注重環保，海洋公園保育基金噚日宣布推出「無飲管運動」，夥拍多間大型連鎖飲食集團、餐廳、學校等，一共超過830間響應，大家都以行動支持，認真要畀個Like！

公關姊妹話，保育基金喺舊年已經首辦「無飲管日」，鼓勵市民減用即棄塑膠飲管，反應好好；加上近年環保意識好強，據保育基金上月調查，就發現受訪嘅1,000位15至59歲香港市民，每星期平均用5.73支塑膠飲管，推算港人每年用約14.4億支塑膠飲管，比舊年同一調查少用咗約2.6億支！

為咗進一步推動無飲管文化，保育基金今年就同大家樂集團、太興飲食集團、肯德基及吉野家等20間大型連鎖餐飲集團，仲有多間本地餐廳同學校合作，推出「無飲管伙伴」、「無飲管八號」同「無飲管星期五」等計劃。參加「無飲管伙伴」計劃嘅機構，承諾全年都唔會主動提供飲管；而參加「無飲管八號」同「無飲管星期五」計劃嘅食肆同學校會喺每月8號或逢星期五，唔會主動提供飲管。大家以後出街食飯就要留意啦！保育基金主席陳晴話，好開心見到愈嚟愈多機構願意響應「無飲管運動」，希望大家由一個小習慣開始，慢慢改變消費模式，實踐減塑生活。

另外，Deliveroo（戶戶送）噚日都宣布，為支持「無飲管運動」，會向其餐廳夥伴免費提供10萬支環保飲管，年底前會為全球所有嘅餐廳夥伴，提供非塑膠包裝嘅選擇。