400呎「智型」窩居設計 VTC學生連贏兩大獎

香港地人多屋細，返到屋企想享受私人空間，對好多打工仔嚟講都係奢望。黛安呢排都諗緊屋企應該點裝修，先可以令家人有大享受。咁啱VTC嘅姊妹報料，佢哋學生諗到利用變形傢俬將生活空間隨心「變大縮小」，就算400呎要住4個人，私隱度一樣滿分，值得港人借鏡。難怪喺HKT Smart Living主辦嘅HKT Smart Living Awards 2018，連贏智能家居設計大獎（學生組別獎金獎），同埋學生組「我最喜愛智能家居設計大獎」，掃走8,000蚊獎學金啦。

講番得獎設計「Mirror」，係由4個HKDI室內設計高級文憑學生王敏毅、謝旻蒑、彭源同范富信合作構思，佢哋眼見香港居所愈來愈狹小，於是以「層疊」做概念，諗出以智能設計去管理嘅新型生活空間。喺Mirror裏面，住戶只需要使用電話，就可以移動組合櫃、餐枱同凳等傢俬，想變做一齊食飯嘅飯廳又得，即時變番個大電視出嚟煲劇又得，方便到不得了。

為咗增加空間感，屋內3間房就用咗並排設計，打開趟門就同客廳連成一體，想有私人空間，閂番門就得，住4個人都好闊落。加埋主人房2個智能衣櫃，平時會合埋可以節省空間，打開後就同洗手間走廊連成一綫，有如臨時衣帽間一樣接通浴室，相當貼心。而且間屋會喺天花板同牆身安裝大型LED板，播出日出日落、海浪泊岸嘅動人美景，等住戶可以保持心境Relax。