高難度「極限武術」暑假登陸昂坪市集

武術就聽得多，「極限武術」又係乜東東？黛安知道，「極限武術」係糅合咗武術、體操、舞蹈同埋空中翻騰多款高難度動作，表演嘅動作包括咗跆拳道中嘅各種單腳旋風同埋旋子360等，大家好快就有機會近距離睇到呢啲高難度表演喇！事關昂坪360喺下月14日至8月26日昂坪市集廣場為市民帶嚟精采嘅「極限武術」表演，表演分3時段，分別係下晝12點半、2點半同埋4點，每節約15分鐘。

大家唔單只有得睇，仲有機會參與添！市民可報名參加工作坊，喺專業表演者現場指導下，親身挑戰「極限武術」，表演後仲可以同表演者影相「集郵」。

公關姊妹亦同黛安講，昂坪360會喺下月14日至9月30日期間推出全年通優惠，只要持有昂坪360全年通嘅市民，同行者可享有纜車車票（標準或水晶車廂）8折優惠，最多4人適用，到時可以約埋三五知己齊齊搭纜車去市集廣場睇表演兼玩餐飽！