海港城推預付禮品卡 送禮購物最實用

黛安每次送禮都好煩惱，唔知送咩好，又怕送完唔啱人哋心水，海港城喺上星期向超過1,800名顧客進行問卷調查，發現近6成人送禮次數每年達5次或以上，而近8成人平均每次花費$1,000或以下，每次花費$1,000以上嘅都有超過2成人。

調查發現有7成人指揀禮物時會有壓力，近4成人要花2日以上買禮物，而即使大家都已經咁精心挑選，仍然有超過9成人表示曾收過唔啱心水禮物，亦有超過4成人指即使收到唔啱心水禮物，都會扮開心接受。黛安仲發現，近7成人會用購物禮券送禮，可以畀收禮者自己揀合適禮物，但大部分人都會買實用性較高嘅超市百貨禮券，但又會畀人感覺欠缺心思，而買個別品牌或商戶嘅禮券送人，貨品選擇又有局限。

有見及此，海港城推出全港首張商場預付禮品卡，適用於商場內500多間接受銀聯嘅商戶。禮品卡有4款不同面值，分別係$500、$2,000、$5,000同$8,000，由下個月5號起喺商場禮品卡銷售處發售。

九龍倉執行董事凌緣庭同黛安講，海港城因應市場需求，推出全港首張商場預付禮品卡，希望可解決大家送禮嘅煩惱，又可以畀收禮嘅人喺海港城500間商戶揀禮物，海港城仲會利用禮品卡推出唔同嘅促銷活動，帶嚟更多顧客。

由下個月5號至8月26號，海港城將率先同銀聯合作舉辦夏日推廣活動，仲送出60萬元禮品卡作消費獎賞，安排稍後喺海港城網站公布。黛安之後送禮物畀親友，就唔使煩惱喇！