希慎進駐利園區 引領潮流95年

要數本港人氣最旺嘅地區，一定唔少得銅鑼灣。但「羅馬非一日建成」，前人貢獻絕對唔少得。同希慎興業姊妹傾開，原來今年喺利希慎先生購入東角地段（即利園區）95周年，令香港人生活從此「潮」起來！

希慎仲特登喺利舞臺廣場地面正門搞咗個「Hysan95」展覽，搵嚟一眾街坊商戶暢談銅鑼灣嘅歷史。上星期五希慎興業主席利蘊蓮（Irene）就喺分享會憶述爺爺當年向怡和洋行買咗東角呢塊地，有感香港較少休憩空間，所以決定打造利園遊樂場等設施，令銅鑼灣變成港人娛樂集中地，呢個信念到今日都無變過。Irene仲話︰「細個好多親戚住喺利園區，所以成日去，經常坐喺利舞臺後面嘅樓梯睇電影同卡通。好想確保呢度會一直係大家享受生活、工作同娛樂嘅地方。」

太平館餐廳第五代掌舵人徐錫安都話，當年阿爺睇中咗銅鑼灣發展好，舖位又較平，決定開分店，當年餐廳仲會為熟客特別改餐牌配合佢哋口味，人情味勁濃。