海洋公園「關心你」獎勵計劃 12000張門票嘉許關愛精神

而家學生面對嘅學業壓力真係唔可以睇少，如果校內多啲關愛氣氛，黛安相信學生嘅壓力可以少啲。海洋公園就聯同「家庭與學校合作事宜委員會」同港大合辦「關心你」獎勵計劃，送出12,000張門票表揚6,000位喺2017／18學年關愛同學方面值得嘉許嘅中學生，亦送出20個「與動物親上加親」體驗活動名額，認真要畀個like啊！

黛安噚日出席頒獎禮，計劃有嚟自310間中學、近6,000位學生獲老師推薦嘉許，其中10位表現最突出嘅同學就獲選為「校園關愛大使」，仲可以參加「與動物親上加親」體驗活動。喺頒獎禮上，3位獲獎學生分享佢哋嘅故事，其中就讀香港道教聯合會圓玄學院第一中學嘅吳海伶同學就話，自己係新移民，初時來港性格怕羞，又擔心適應唔到校園生活，之後加入咗學校一個幫新來港同學適應學習環境嘅小組，最後同小組嘅同學仔成為好朋友，令佢明白到要主動幫助有需要嘅人。

海洋公園行政總裁李繩宗就話，好開心同合作夥伴有共同目標，齊支持同宣揚校園關愛文化。