中大校友演舞台劇 4任校長齊參演

今年係話劇藝術引入中國111年，黛安日前就應中大舊生兼《晴報》專欄作家張宏艷（Lavender）同埋公關界殿堂大姐大葉潔馨（Kitty）邀請，出席中大校友會聯會主辦嘅一個舞台劇《摯愛》（My Love）嘅聚會。

聽話劇編劇和總策劃嘅校友梁鳳儀博士講，《摯愛》以1953年至九七前後，香港嘅金融故事作時代背景，製作費超過700萬，台前幕後都係中大校友；最精采係中大現任校董會主席梁乃鵬、現任校長段崇智同埋3位前任校長沈祖堯、劉遵義同埋李國章等都會參與演出，仲會唱歌！最難得係大家一呼百應，仲請到同屬中大人嘅話劇界名人陳健彬、冼杞然分別擔任監製、總導演，國學教授何文匯仲會負責作曲作詞。

陳健彬話，今次活動得到全球校友支持，雖然劇本只有20多個角色，但有139人參與演出面試，有人仲特登由多倫多飛去溫哥華面試。主辦方為咗令更多人可以參加演出，決定將個劇分成A、B角；由於舞台劇係以香港五十年代至1997嘅社會做背景，男女主角亦分開唔同年齡層演出，令多啲校友可參與其中。《摯愛》將會喺香港、北京、深圳、倫敦同埋溫哥華做全球巡迴演出，為中大籌款，實在好令人好期待！