黛安
黛安

培訓餐廳Café Imagine 中學生做老闆學營商

發佈時間: 2018/07/12

培訓餐廳Café Imagine 中學生做老闆學營商

相信唔少年輕人都有個創業夢,黛安知道,香港基督教青年會(YMCA)培訓餐廳Café Imagine,最近同短期合作平台「共享餐廳」(Sharing Cafe)合作,畀26位來自屯門嘅宣道會陳瑞芝紀念中學嘅中四學生試下做5日「小老闆」。

YMCA會員服務、專業及運動培訓總監蔡偉邦同黛安講,創業者面對最大嘅難題就係高昂租金,所以希望可用短期同平租為青少年提供創業商機。佢話,今次「共享餐廳」嘅社學合作好有意義,一班中學生只要每人注資500蚊,就可以做5日老闆,又可以畀佢哋走出屯門區,去到長沙灣同深水埗區了解實際市場需求,應用到課堂上嘅營商技巧。

呢26位小老闆都係修讀企業、會計與財務概論,雖然佢哋只係開舖5日,但都非常認真,由構思餐單主題,到市場調查、執行計劃、餐廳前後台作業流程、管理監察同會計入帳等,都自己落手做,所有都係由零開始,真正實踐課堂所學內容,而港青資深導師亦會提供專業培訓同課程,幫佢哋執行餐廳營運項目。

黛安見同學們設計餐單都有板有眼,好似蜜汁豬頸肉漢堡包,係採用特色醬料醃肉,同學們仲試咗多款mix and match醬料,最後先研發出呢隻秘製蜜汁,另外仲有而家文青大熱嘅All-Day-Breakfast餐,兩款食品都只係賣58蚊,相當抵食!

宣道會陳瑞芝紀念中學梁老師同黛安講,今次合作可幫助同學開拓眼界,汲取營商經驗,亦幫到佢哋發揮創意同團隊合作精神。餐廳由聽日起開到17號,大家快把握機會去支持下班同學仔啦!

撰文: 黛安 消息特靈八卦公關
欄名: 八卦名利場