蔡瀾的越南粉

午飯時間行過威靈頓街，竟見到一條長長的人龍，排隊排到轉彎的德己立街，仲以為銀行擠提！原來是蔡瀾新開了一間越南粉店「蔡瀾PHO」，好奇之下，拿了張餐單來看看。一碗越南粉或者檬粉都係60幾蚊，可以選兩種配料，以中環來說，價錢算是便宜了。

急不及待想試，但擔心午飯時間唔夠時間排隊，於是一放工便立即衝過去，幸好六點左右人龍沒有那麼長，排了一陣就入到去。叫了一碗越南牛肉河。河粉大碗、料多、味道正！湯底是牛肉湯，飲完也沒有覺得口渴，相信是沒有加味精，這點比其他越南粉好好多。加上一個香芒凌波魚米紙卷，芒果味好香，再加一杯越南滴漏咖啡，心滿意足！

最令人覺得溫暖的是店家的待客態度，首先是越南粉免費任加，所以就算是大胃口的男士都一定吃得飽！店內看到有部製粉機，河粉都是新鮮製成。另外，香港人成日都要用手提電話，好容易無電，於是店內提供借充電器的服務，照顧各位在中環返工的人。另一點抵讚的是孕婦可以優先入座，唔使排隊，咁細心，唔怪得排晒長龍啦！

（本欄逢周一刊登）