北角新酒店 即劏靚魚Show

不少高級日本餐廳，會以即劏靚魚Show做賣點，估不到連食Buffet也有這極尚享受。北角最新五星級酒店Hotel VIC的自助晚餐，每逢周六有大廚即劏原條靚魚做刺身，好彩的話，可以大擦日本藍鰭吞拿。

自助餐廳名為The Farmhouse，由獲獎無數的室內設計師André Fu設計，以木材、天然光、綠色植物，帶出農家感覺，既有餐桌椅，也有多張舒適梳化，奉送靚海景，還設有一個戶外花園，好好Feel。

醉人夜色伴美食

識食，一定要揀Dinner buffet，醉人夜色襯托下，飽嘗超過250款美食。回本首選，一定是凍海鮮、刺身等，龍蝦、凍蟹、大蜆等都不缺，星期六晚限定的還有大廚即劏原條靚魚做刺身，魚類款式按時令而定，吞拿魚、三文魚、油甘魚等輪流出場。凍海鮮每天供應5、6款，包括波士頓龍蝦、凍花蟹、翡翠螺、阿拉斯加蟹腳、青口及海中蝦等。

熱葷推介，煎法國Rougié鴨肝，件件油潤甘香。燒西冷亦吸引，原條重5公斤的澳洲西冷，肉色粉嫩，另有即燒牛柳、羊架及串燒，食肉獸最愛。即製美食還有意粉、薄餅、越式牛肉粉等，熱辣美味。揀甜品做結尾，一定要食雪糕，只因有個搶鏡雪糕機，識自轉，裝着5、6款口味杯裝雪糕，全屬名牌Mövenpick、Häagen Dazs貨色，稍後還有雪條及意大利雪糕球，選擇豐富。

The Farmhouse咖啡廳

地址︰北角北角邨里1號海匯酒店2樓

電話︰3896 9896

自助晚餐供應時間︰6:30pm-10:30pm

收費︰星期一至四$598/位、星期五至日、公眾假期及前夕$668/位，設加一

編輯︰余運慶

美術︰梁政敏