第3屆學界電競決賽 名校生贏中學組冠軍

電競比賽近年成熱門運動，產業規模超過15億美元，即係大約等於117億港元，認真厲害，而且全球每月觀看人數達1.7億，仲成為咗今年亞運項目之一，令到黛安都多咗留意。黛安噚日就去數碼港舉行嘅第三屆聯校電競大賽決賽湊熱鬧，有20多間中學同大專院校參加，比賽有3個遊戲，包括《FIFA18》、《皇室戰爭》同《LoL英雄聯盟》進行決賽，現場有唔少觀眾專門嚟睇賽事，仲有本地女子電競戰隊PandaCute同現場觀眾打表演賽，真係令黛安大開眼界。

喺《皇室戰爭》中學組贏咗冠軍、即將升讀中三嘅華仁書院同學馮浩揚同黛安講，勝利關鍵係團隊合作精神同準備充足，又話父母都好支持佢打電競，但佢將來就唔打算做電競選手，理想係做醫生，所以佢未來打算要減少打機時間，專心學業。佢仲話如果贏咗比賽，會向校長提出喺校內增設電競學會！

至於《FIFA18》大專組冠軍蘇子謙就讀緊IVE酒店管理，佢話覺得電競喺香港發展起步較遲，家長、學校對電競仍有誤解。

今次賽事揭幕禮，仲有唔少嘉賓出席，好似協辦商Razer（雷蛇）投資者關係總監羅啟琳，佢就同黛安講，香港有優勢、有人才，值得「大搞」電競產業，等香港青年人可發展所長。主辦單位香港學生電競總會主席梁雅姿就話，總會有到訪不同學校開講座，向學生和老師講解電競發展，仲希望將來每間中學都有自己嘅電競隊。