陳家樂徒手開榴槤騷真功夫

今年初憑劇集爆紅的陳家樂近日密密拍廣告吸金，日前為大新銀行拍攝廣告，化身中國人、日本人、泰國人及英國人等。一向是「榴槤控」的家樂其實剛從馬來西亞回港，在當地已狂食榴槤。今次拍廣告時，他扮泰國人正好有榴槤作道具，基於食得唔好嘥，他在沒任何工具的情況下，即場搵膠袋袋好榴槤，然後「劈」落地下，只掟兩下已「赤手空拳」將榴槤「劈開」品嘗。家樂又透露難忘經歷︰「細個試過一次食兩個榴槤，因為唔識飽，最後食到嘔番晒出嚟，榴槤味加嘔吐味，可以想像幾咁勁！」