香港樓價高企，「特快公屋編配計劃」近日接受申請，有申請者慨嘆上樓難，即使要住凶宅、住近垃圾房等都唔驚。而喺台灣，就有租屋網站日前出現一則以「廢墟套房 誠徵有緣人」為題嘅出租廣告，屋主以每月租金4444元台幣，即係大約1150港元，出租台中一個套房。原來，呢間套房位於有「台中鬼屋」之稱嘅千越大樓；大樓曾經歷火災，已荒廢成40年，更係當地網傳嘅「十大鬼屋」之一！
睇樓要自備「勇敢的心臟」
屋主喺廣告中嘅言詞亦都好嚇人，除咗話「四季陰涼夏天不需開冷氣」、「可養任何有形無形的寵物」、「此棟大樓，部分樓層已荒廢20年，因此前房客請了文關公像坐鎮添加陽氣」外，更建議有意者喺太陽落山前到場睇樓，「房東不喜歡晚上進來」，而且「晚上看房走廊有點暗請自備手電筒、勇敢的心臟、好走的鞋，部分公共區域毀損行走困難」。
大樓發生幾次大火
據悉，千越大樓經歷過幾次大火，目前只剩1樓部分店舖，樓上則宛如廢墟，得返5樓呢層仲有人住。房主fd子陳先生話，原本房主委託佢以傳統方式出租套房，但2個月來都無人問津；最終改以「廢墟套房」打正旗號，除咗引起討論之餘，更竟然成功將套房租出！
圖片來源：PigRent租個窩