港中學生參加體驗營 感受太空人生活

由香港中華總商會贊助、為期8日嘅「少年太空人體驗營2018」早前圓滿結束；黛安噚日就去咗香港太空館參與學生嘅分享會。

聽公關姊妹講，呢個體驗營今年已經係第10屆，有30位嚟自唔同學校嘅中學生參加，8日內參觀國內唔同嘅航天設施，如航天員中心、酒泉衛星發射中心等，更同航天員對話同體驗航天員訓練。

分享會中，仲播番8日行程嘅點滴，畀班學員好好回味。嚟自瑪利曼中學嘅鄭亦言話，參觀酒泉衛星發射中心係最大得着，因為酒泉係發射中國第1顆人造衛星東方紅一號，可以見證住中國航天發展成功，感到非常雀躍。另外，佢試着航天服，着上身好悶熱，而且着咗好難行走，但亦覺得係個難得體驗。而嚟自荃灣官立中學同拔萃女書院嘅同學陳蔚堯同吳家希，就齊齊獲得今次嘅「最佳表現」獎！