盂蘭節氣魄更壯，盂蘭勝會心中不必驚慌～聽日就係一年一度嘅農曆七月十四鬼節，大家不妨喺以下8套港產恐怖片，揀幾套睇吓嚟應應節！
1. 《見鬼》
喺2002年上映嘅《見鬼》係本港恐怖片代表作之一，由彭氏兄弟彭順及彭發執導，有「鬼后」之稱嘅李心潔、周俊偉、盧巧音等主演，李心潔更憑此片奪得第39屆金馬獎最佳女主角。李心潔飾演嘅女主角汶自幼失明，終於有一天接受咗角膜移植，開始能夠睇到周圍的事物。不過，因為佢睇到嘅世界同其他人睇嘅有所不同，因而帶來無盡煩惱。當中最經典嘅一幕，莫過於李心潔獨自搭𨋢時撞見一隻凹頭嘅阿伯鬼，搞到唔少人之後怕咗搭𨋢！
2. 《怪物》
《怪物》喺2005年上映，由鄭保瑞執導，舒淇、林嘉欣、方中信及林雪主演。林嘉欣飾演嘅新移民，因為政府收地俾地產商起豪宅而家破人亡；而方中信同舒淇飾演嘅中產夫妻，好唔容易以為買到一個安樂窩，冇諗到自己微小嘅快樂原來係建築喺別人巨大嘅痛苦上，一搬入去就怪事連連，甚至連個仔都失去埋……呢套戲最大嘅賣點，可算是林嘉欣犧牲美貌扮怪物！
3. 《異度空間》
《異度空間》喺2002年上映，由羅志良執導，張國榮、林嘉欣主演。故事講述林嘉欣飾演嘅章昕經常睇到鬼魂，家人於是帶佢見張國榮飾演嘅心理醫生Jim。阿Jim知道章昕所見嘅係因為長久孤閉所生嘅幻覺，決定竭盡全力幫佢；喺治療過程中，兩人漸生感情。後來章昕痊癒，卻發覺男友阿Jim有諸多怪異舉動；為令阿Jim回復正常，昕幫佢從可怕嘅回憶走出來……而呢套戲，亦都係哥哥張國榮生前拍攝嘅最後一部電影。
4. 《三更2之餃子》
呢套戲係《三更2》嘅其中一個故事《餃子》，喺2004年上映，由陳果執導，楊千嬅、梁家輝、白靈主演。故事講述用嬰胎做餡所包嘅餃子，據說食咗之後可以使人回復青春；楊千嬅飾演嘅女主角為奪回丈夫個心，不惜搵醫生尋找以胚胎作餡嘅餃子。而楊千嬅拍完套戲後，更搞到驚咗食餃子！
5. 《幽靈人間》
《幽靈人間》喺2001年上映，由許鞍華執導，陳奕迅、舒淇主演。故事講述15年前一宗交通事故，令一個男人頭卡喺車身下，身首分離。15年後，陳奕迅飾演嘅髮型師Peter同舒淇飾演嘅June發生一夜情。 June自稱陰陽眼可以見到鬼，自兩人一齊咗後怪事連連發生，Peter目睹種種怪事；當June提醒佢有無頭鬼要索佢命時，Peter只當佢胡言亂語，一氣之下同佢分手。但原來June講得冇錯，一切靈異詭秘都緣自15年前嘅車禍……值得一提嘅係，當年張海報由於場景為地鐵（港鐵前名）車廂入面，地鐵認為會引發乘客不適，不但拒絕張貼海報，甚至要求該片刪除地鐵相關嘅電影橋段！
6. 《殭屍》
《殭屍》喺2013年上映，由麥浚龍自編自導，並由有日本恐怖大師之稱嘅清水崇監製。呢套戲主要係參考1985年嘅《殭屍先生》，主演都係當年《殭屍先生》嘅錢小豪、陳友等演員，並加入鮑起靜、惠英紅影后級演員陣容。故事係講述由錢小豪飾演嘅80年代知名動作影星小豪，曾經憑《殭屍先生》飾演殭屍獵人紅極一時，可惜現風光不再，且情感、家庭生活不順，只好無奈遷入公屋凶宅單位「2442」居住。小豪決定喺凶宅內了結生命，卻遇上一啲改變命運嘅人……
7. 《回魂夜》
唔想太過恐怖，可以選擇喺1995年上映、充滿黑色幽默嘅《回魂夜》！呢套戲由劉鎮偉執導，周星馳、莫文蔚、李力持、黃一飛等主演。故事講述周星馳飾演嘅捉鬼大師，為調查李老太嘅死，展開一場同厲鬼嘅對戰。片中有唔少恐怖、血腥位嘅同時，亦有唔少笑位；其中搽牛眼淚一幕，真係好經典！（仲有莫文蔚個假髮！）
8. 《四月四日》
唔知大家知唔知，子華神唔止做棟篤笑，仲拍過鬼片㗎！除咗同黃秋生喺1995年嘅作品《二月三十》外，仲有《四月四日》呢套！喺1997年上映嘅《四月四日》由錢升瑋執導，黃子華、羅蘭主演。故事講述家開棺材店嘅女童婷婷缺課幾日，老師為此登門造訪，竟發現婷婷父母血肉糢糊慘死；老師因此嚇瘋，而婷婷則從此不再開口說話。女社工Sam接手照顧婷婷，發現婷婷被人多次嚴重虐待過，其留後一連串離奇詭異嘅事情就開始發生……
圖片來源：網上圖片