新閱會嘉許禮 鼓勵校園閱讀

培養閱讀嘅好習慣非常重要，黛安知道新鴻基地產（新地）嘅新閱會舉辦嘅「閱讀．分享」校園計劃已經踏入第5年，噚日仲有嘉許禮表揚參與嘅學校同師生！

聽公關姊妹講，「閱讀．分享」校園計劃喺上學年共舉辦咗125場到校同參觀活動，包括請嚟24位社會名人同作家，好似有鮮魚行學校榮休校長梁紀昌、作家及廣告創作人黃獎、著名漫畫家馬龍等，以輕鬆有趣又具啟發性嘅分享同工作坊，將愉快嘅閱讀氣氛帶入校園。

姊妹仲話，計劃透過「給家人的一封信」比賽，鼓勵學生以書信或者明信片形式，同屋企人分享從書本中所帶嚟嘅啟發同感受，總共收到超過2,000份作品！比賽分做初小同高小組別，唔少作品都憑書寄意，向屋企人訴說心裏話同表達關懷，其中初小組金獎得主張順怡，就係信中寫到因為睇過《猜猜我有多愛你最喜歡的地方》之後，終於知道媽咪有幾愛佢。

噚日嘉許禮，就頒發咗多個喜「閱」獎項，港澳信義會明道小學就獲頒「喜閱學校」金獎，嘉許佢哋咁踴躍參與活動。