相信唔少打工仔都試過食離職同事嘅散水餅，又或者自己都派過。有網民喺網上討論區，話自己前日last day，本來諗住放lunch去西餅店「求其執十幾件餅就算」，點知「唔知邊位同事整咗張list話要飲Sharetea，依家佢地填晒話要飲咩」。而且，班同事仲要求多多，「又話要少糖又話少冰咁」，所以佢hold住咗張紙，喺討論區開po問其他網民到底買唔買嘢飲好。
網民撐唔好買
呢件事引來大批網民留言，當中有好多人撐佢唔好買嘢飲，「即場撕爛佢啦」、「用公司茶包沖比佢地啦」、「last day你大晒，驚咩」、「你last day，唔送都冇人咬到你」、「老奉啊宜家」、「俾我唔買，咩都唔買」、「都無幾可再見架啦，求其買咪算，HR同上司個杯就可以買」。同時，亦有網民分享自身經歷，「我嗰時比人屈買 Godiva」、「我同事叫我買Lady M」、「試過intern都俾人問散水餅」。
有人認為派散水餅文化不可取
另有網民認為，派散水餅文化並不可取，「依家啲人視散水餅為理所當然」、「辭職不外乎做得唔開心，人事嘢嚟，做咩我走仲要買野俾你地？如果同事真係好好嘅，咁另計」、「散水餅呢個文化係點嚟？啲人成日買散水餅等於好嚟好去，相處咗咁耐好定唔好大家心照啦」。
派散水餅係為咗大家開心
不過，亦有網民指出，其實派散水餅都只係為咗大家開心，「出黎做嘢就大方啲，唔好吓吓計較」、「反正都最後一日」、「如果啲同事好好人，請佢地食餅又有乜所謂」、「呢家嘢真係要問心，開心所以請人食我覺得OK」。咁唔知大家又點睇呢？