Keven 加盟如心酒店 可喜可賀

黛安向來為食，上星期應如心海景酒店行政副總裁鍾慧敏（Sylvia）邀請，去旗下嘅荃灣如心海景酒店粵滬中菜廳試菜，順便介紹新上任嘅如心海景酒店暨會議中心總經理陳天祐（Keven）畀黛安認識，同場仲有《晴報》社長麥華章（麥sir）和專欄作家Cally，夠晒熱鬧！

Keven係酒店界名人，喺帝苑酒店和新鴻基旗下酒店擔任副總裁及總經理逾28年，今次加盟如心酒店，黛安恭喜Sylvia如虎添翼。Keven又係食家，當晚特別安排餐單；黛安係蟹癡，見有奄仔蟹食，特別興奮，打開蟹殼爆晒膏，簡直好似食緊黃油蟹咁正！另一道不得不提嘅係用杞子雪菜蒸頭腩，有心思，行政總廚（粵菜）胡家強師傅果然功力非凡！最令黛安驚喜係一般菜單尾以炒麵或炒飯作結，但今次竟係難度超高嘅雲吞麵。碗麵風味十足，麵質彈牙無鹼水味，湯底有靚大地魚，雲吞皮薄餡靚，即使食咗咁多嘢，黛安依然成碗食晒無得剩；就係太吸引搞到唔記得影相，而家諗番仍回味無窮。