西九自由約 首度進駐文化區藝術公園

西九文化區「自由約」有表演睇又有市集行，所以每次舉行都吸引好多文青去「朝聖」，新一季「自由約」喺下月開始，至明年3月、逢每月第二個周末舉行，黛安收到風，今年佢哋仲會「搬新屋」，首次進駐西九嘅永久設施藝術公園！

公關姊妹同黛安講，過往3年嘅「自由約」係喺西九文化區苗圃公園舉行，不過苗圃公園係臨時場地，活動今年就首次喺西九文化區內嘅永久設施藝術公園舉行，藝術公園草地面積大，可以令表演活動更加集中，加上公園附近就係海濱，仲可以欣賞埋日落同維港景色！

西九表演藝術行政總監茹國烈就話，呢幾年正式建造藝術公園，公園有大草地、室內場地「自由空間」，亦有更好嘅角度去睇日落同維港，希望市民能夠透過「自由約」認識西九嘅藝術公園，吸引更多人嚟到呢個地方。

黛安知道，今年「自由約」新主題係「空間」，畀大家透過活動去探討4個有關「空間」嘅議題，包括「香港是甚麽空間和世界有何聯繫」、「環境和環保的空間」、「集體及自我空間」同埋「對未來一代的空間」。「自由約」製作人（音樂及戶外）羅慧欣就話，定立呢個主題係因為活動第一年進駐永久設施，令佢反思要點樣利用呢個空間。

將會喺「自由約」表演嘅樂隊The Black Sheepee同The Afternoon Tea就話，會為觀眾帶嚟小清新混合爵士嘅音樂風格。「自由約」嘅活動內容咁精采豐富，黛安都準備放假時約埋班好姊妹去鬆一鬆喇！