韓國影院CGV 9月進駐D2 Place

黛安係百分百韓迷，最近收到風知道韓國影院品牌CJ CGV，會喺香港開設首個香港CGV Cinemas，而且下個月就開幕，當然包括以韓星為主題嘅CGV電影館「孔劉館」啦！

公關姊妹話CJ CGV係全球國際影院品牌排名第5，喺中國、美國、土耳其等地都有，今次落戶荔枝角D2 Place二期，就設有4個主題影廳可提供500個座位，仲有全港首個ScreenX影廳，配備270度投影技術，令電影放映唔再局限喺一面銀幕上，而是擴展至影廳兩側嘅牆壁，實現三屏全景放映，真係視聽級享受。

而「孔劉館」亦都係CGV首次以韓國明星命名嘅電影館，讓大家欣賞電影之餘，仲可以順便打下卡。孔劉仲拍咗短片宣傳，佢話作為一名演員，好榮幸有一個以佢名字命名嘅電影館，仲話講起香港，就會諗起香港電影，好似80、90年代嘅張國榮、周潤發等，當時喺韓國都掀起一股熱潮。今次CGV都承諾，將日後「孔劉館」部分嘅票房收入捐出，以支持香港電影或培育新晉導演及演員等工作，為香港本土電影發展出一分力。