到底港鐵邊個站係最熱嘅問題，相信唔係咁多人有思考過。有網民日前喺網上討論區以「全港最熱嘅地鐵站」為題開post，指最熱嘅一定係紅磡站，「企喺度等車唔夠一分鐘已經出晒汗，兩分鐘已經汗流浹背」。另有網民則認為除咗紅磡站外，九龍灣站、觀塘站等架空站都好熱，「夏天熱到全身濕晒」。
紅磡站又熱又焗
樓主表示，紅磡站又熱又焗，「企耐少少，我驚人都溶」，搞到要匿入廁所「避暑」，「廁所個冷氣吹過嚟，爽到欲仙欲死咁，永遠企係廁所等車」。對於有網民指出，其實所有非室內嘅車嘅站都好熱，樓主表示：「熱唔係一個問題，大佬佢（紅磡站）仲要噴熱風！」
網民認為紅磡站係人間煉獄
此事引來大批網民熱議，有人表示十分認同樓主，「紅磡最痴線係明明咁大個站，由月台至出閘後都係冇冷氣。上次去food court食野熱到，得部垃圾風機，行去搭巴士嗰個位又係人間煉獄嚟！」
旺角東九龍灣觀塘都好熱
另外，亦有唔少網民紛拋出自己覺得好熱嘅車站，「旺角東唔係熱，係焗呀，焗到透唔到氣！」、「紅磡係大佬級......熱仲要焗，之後排名分先後，旺角東-觀塘-九龍灣」、「一定係柴灣，明明密封晒都唔裝冷氣，變左毒氣室」、「杏花邨，室內站無冷氣」、「大圍，馬鐵走過去企真係大汗疊細汗」、「中環多人搞到好熱，返工放工都出晒汗」、「深水埗，又唔係露天唔知點解咁熱」。
至於最涼港鐵站，有網民笑言：「東涌線沿線一定係最強冷氣，喺出口未入站已經feel到個陣冷氣！夏天救星！」、「西鐵線都好涼，除左大焗爐boss（紅磡站）！」