黛安
黛安

美心「圓月太空限定店」 登陸銅鑼灣希慎廣場

發佈時間: 2018/09/03

美心「圓月太空限定店」 登陸銅鑼灣希慎廣場

美心流心奶黃月餅幾度賣斷市,真係一盒難求!美心月餅噚日起至25號,開咗「圓月太空限定店」,全港最大嘅「月亮」登陸銅鑼灣希慎廣場,第一日開幕已經吸引好多人嚟到打卡!

今年美心請嚟藝人陳慧琳(Kelly)同張智霖(Chilam)做代言人,平日喺地鐵站、街道廣告都見到佢哋蹤影,真係無遠弗屆,黛安噚日出席時,見到佢哋真人,真係好開心。

黛安喺活動現場見到好姊妹美心產品市務主管梁志歡(Eve)、同美心西餅及美心產品總經理蘇鴻基(Patrick),即刻恭喜佢哋,將美心月餅搞得咁成功,就連黛安都成日畀班好姊妹問,點樣先可以買到美心流心奶黃月餅。

聽Eve講,今次限定店有一個110吋大嘅巨型月亮,最啱畀大家打卡上載到社交平台,只要每日喺各三個指定時段內,首100位上傳嘅朋友仔,就可獲得一個流心奶黃月餅啦!又或者由專業人士幫大家影相,之後like美心食品fb就可以幫你print相,再捐$10畀「點滴是生命」,即刻可換購特別設計嘅太空隕石相架,同最愛留念。

現場仲有「太空兔互動彩繪基地」,小朋友畫完自己設計嘅太空兔,就可以經電腦scan去廣場1樓中庭嘅超大屏幕,每完成一隻太空兔,美心就會同時捐出1個雙黃白蓮蓉月餅畀「點滴是生命」做慈善用途,等更多人可以分享到中秋嘅溫暖同團圓,好有意義啊!

撰文: 黛安 消息特靈八卦公關
欄名: 八卦名利場