黛安
黛安

浸大推動廚餘回收 建立環保好習慣

發佈時間: 2018/09/04

浸大推動廚餘回收 建立環保好習慣

平時出街食飯如果食唔晒,黛安都鍾意打包,避免製造太多廚餘。新學年剛開始,黛安就聽到好消息,就係香港浸會大學統籌咗校內食肆同埋中醫藥診所,將收集到嘅廚餘包括藥渣等,運送去小蠔灣有機資源回收中心,預計每年可救番逾100噸廚餘!

黛安知道,浸大係屬於全港首批參與呢項廚餘回收計劃嘅大專院校,推動校內共12間食肆同埋一間中醫藥診所,喺煎藥室、廚房同大眾飯堂分類廚餘,部分食肆仲特設「廚餘分類站」,用「一條龍」式嘅設計指示顧客按部就班分開液體、廚餘同埋垃圾,再歸還餐具同埋餐盤,條理好分明。

為咗幫顧客更容易掌握廚餘分類知識,浸大學生仲化身綠色大使擔任「廚餘FUN類達人」,不定期喺校內食肆即場鼓勵、引導同埋協助顧客正確分類廚餘。開學頭一星期,大使會喺校園推廣正確廚餘分類方式同步驟。

大使之一、化學系(環境研究)畢業生Catherine話,大部分顧客都好踴躍響應計劃,令一啲本身唔太積極嘅顧客都嘗試分類。黛安知道,Catherine曾去芬蘭交流咗半年,佢認為當地人有好強嘅回收意識,都係建基於習慣,所以覺得香港人只需花啲時間培養正確習慣,都一定可以做好廚餘分類。黛安都好希望愈嚟愈多人加入「綠色」行列,為環保出一分力!

撰文: 黛安 消息特靈八卦公關
欄名: 八卦名利場