團結香港基金「創科博覽2018」 展出逾160項科研作品

黛安應Link-Work好姊妹葉潔馨（Kitty）邀請，同一班好友出席飯局，席間見到團結香港基金總幹事鄭李錦芬（Eva）、港科院院長徐立之等多位猛人。團結香港基金舉辦嘅「創科博覽2018」，會喺今個月23日至下月2日喺灣仔會展舉辦，今年主題係「驅動創新繼往開來」，仲分為「工」、「農」、「醫」3大主題，展出超過160項展品，數量更係歷屆之冠。

聽Eva講，過去兩屆嘅入場人數屢創新高，希望今年可打破舊年11.4萬入場人次紀錄，又期望可啟發年輕人嘅創科興趣。

徐院長話，本港創科發展正喺黃金時代，機遇眾多，但人才先係創科重點，希望學生對唔同問題多思考。佢仲舉例話，唔少學校比賽要求學生用唔同方法令隻雞蛋跌落地但唔會爛，學生只係識得將隻雞蛋包實做好保護，但就忽略咗只要用降落傘令雞蛋降速，都做到相同效果，這才是比賽的精髓。

聽Eva講，今次3大主題展區有好多精采展品，好似「工」展區就有長城、山海關、北江大橋等模型，仲可用VR技術體驗港珠澳大橋風光；「農」展區就有無人栽種業，同經高電離、微重力培育嘅「太空種子」；「醫」展區就有最尖端分子影像腫瘤智能診斷技術。除咗內地展品，仲有屬於港人科創成果嘅香港之光展區，等大家都可認識下本港發明家嘅創作。博覽咁多精采內容，黛安都約定好姊妹一齊去見識下！