D2 Place「香港の秋祭り」 體驗日式慶典

好多香港人都鍾意去日本旅行，黛安都唔例外，不過工作太忙未必抽到時間去，D2 Place一期最近舉行緊嘅「香港の秋祭り」市集，就可以滿足到「日本控」嘅願望。

黛安知道，佢哋今次邀請咗超過20個日本品牌首次登陸香港，包括好多日式美食，例如用和牛製成嘅漢堡同三文治、大阪「北極冰」，仲有北海道出產嘅芝士扇貝。

除咗一眾日式美食外，現場仲設有成人同小童浴衣租用區，畀大家打造祭典look，影番輯靚相，之後又可以去布景區「打卡」。現場有30款浴衣畀男女老幼租借，啲浴衣仲係由日本空運直送到港，夠晒原汁原味！浴衣基本租借服務收費分別係每15分鐘40蚊港元，同埋每2小時250蚊港元（需另加400蚊港元按金）。

另外，市集仲有充滿日本特色嘅傳統工藝工作坊，包括日式豆皿工作坊同常滑燒動物陶瓷等，市集即日起至9月9日（每日開放），大家快啲去感受下日本濃厚嘅節日氣氛啦！