黛安
黛安

澳洲型廚操刀 Alibi西餐充滿驚喜

發佈時間: 2018/09/06

澳洲型廚操刀 Alibi西餐充滿驚喜

黛安前晚認識咗幾位又靚又聰明嘅姊妹︰康得思酒店公共關係及傳訊總監Mavis和助理總監Win,仲有助理行政經理Elaine Joe,佢哋工作卓越,且識飲識食。

前晚佢哋喺酒店嘅Alibi設宴,黛安都有捧場,仲見到《晴報》作者Esther Wong,同埋靚女好姊妹Irene及Iris。晚宴特別之處係邀請咗澳洲籍名廚Ashley Davis嚟做客席廚師,同Alibi主廚James Oakley攜手為賓客奉上五道菜六款酒嘅精緻晚宴。

呢位澳洲星級名廚,有型又靚仔,難怪得吸引到不少女士同佢合照。而且佢來頭不小,曾帶領倫敦Connaught酒店嘅著名餐廳Helene Darroze,由米芝蓮1星升至2星,回歸墨爾本後加入Pure South,帶領餐廳獲得澳洲美食指南《Good Food Guide》1 Chef Hat大獎。之後仲開咗自己嘅餐廳Copper Pot Seddon,亦同樣獲1 Chef Hat嘅榮譽。

佢嘅美食以時令食材為主,今次晚宴所有食材都係從澳洲帶嚟,擺設簡約中見心思。第一道菜是Angasi蠔,係現時澳洲最當造嘅,海水味濃厚又帶啲清鮮,係一流前菜。另外一道係Hiramasa Kingfish,喺煎香嘅魚皮上灑上薑粒、蔥粒,有我哋廣東人吃蒸魚嘅feel。最令人驚喜係單睇賣相已值100分嘅Queensland King Prawn Carpaccio,生蝦壓成片狀,好似一個長方形水池,更是賞心悅目。呢餐晚宴,實在難忘;可惜Ashley只嚟客串兩日,聽日佢就飛返澳洲。黛安同幾位新相識嘅姊妹講,以後一定要多見面,同佢地學嘢。

撰文: 黛安 消息特靈八卦公關
欄名: 八卦名利場