天際100高鐵優惠 睇維港靚景歎美食

高鐵今個月底就通車，黛安都好期待！聽公關姊妹講，九龍站上蓋嘅天際100香港觀景台，就特別推出各款優惠，等國內、外旅客，以至港人都可以搭住高鐵嚟睇維港靚景。

黛安知道，天際100時不時都有優惠推出，天際100香港觀景台總經理黃慧儀（Stella）就話，高鐵開通之後，嚟天際100只需要10分鐘步程，非常方便，之後可以行去佐敦、油麻地購物又得，又或者坐東涌綫去中環香港站，漫遊半山文藝熱點打卡都得。

Stella話，相信天際100會成為高鐵旅客暢遊香港嘅第一站，所以由今個月23號至12月30號，天際100會推出「高鐵車票當錢使」推廣活動，本港、國內及海外旅客，喺天際100一樓票務大堂買價值188元嘅正價成人門票時，只要出示往返西九龍站嘅高鐵車票，即刻就可以減50蚊，即係等於有73折，好抵啊！

唔單止咁，佢話嚟緊會同旅發局、內地旅行社合作，陸續推出高鐵票價優惠，主打車程6小時內嘅地區，仲會送出限量紀念品、餐飲優惠券、照相館折扣券等，將來要嚟香港食魚蛋粉就話咁易啦！

而下個月嘅國慶煙花滙演，天際100官網已經有門票賣啦，每位298元，包括天際100入場門票同1杯指定飲品，數量有限，要買就要趁手啦！