PMQ咖啡生活市集 雲集海外人氣品牌

咖啡可以話係唔少人每日嘅必需品，但當中嘅學問，你又知多少呢？黛安知道，PMQ元創方今個月21至23號一連3日，將會再次舉行「The Coffee Agenda咖啡生活市集」，由本地海外多個優秀咖啡師為你親自沖製咖啡，仲有生活用品市集、分享會同咖啡工作坊等，真係幻想到咖啡香滿溢！

黛安知道，今次市集首次請咗8間來自日本、台灣同澳門嘅過江龍人氣咖啡品牌，仲有15間本地人氣精品咖啡品牌駐場，為大家即場沖製一杯杯靚咖啡，兼售賣自家烘焙咖啡豆等，互相交流之餘，仲可以見識到市面上好少見嘅咖啡調酒、精品土耳其咖啡，同埋拉花藝術等！

飲完想學嘢亦得，因為市集同時邀請咗咖啡教學培訓中心Barista HK合作，策劃咗多個不同深淺程度嘅工作坊，仲有咖啡師同業內人士主講嘅分享會，咁以後就算喺屋企都沖到高品質嘅咖啡喇！咁吸引，有興趣嘅朋友記住唔好錯過！