工銀亞洲慈善跑 千人中環同樂

假期跑跑步，不但有益身心，更可行善助人。工商銀行（亞洲）公關姊妹同黛安講，噚日首次在港舉行「工銀亞洲悅跑越勇2018」，單計2項精英賽已吸引超過1,100名跑手參加，親子賽都有好多家長一齊同小朋友挑戰難度，邊跑邊諗計越過障礙物完成任務，動手腳更要動腦筋，難怪完成後大家都好有滿足感。

工銀亞洲姊妹仲話，今次賽事唔單止畀跑手機會挑戰自我，報名費用更會捐畀明愛做慈善，齊齊弘揚香港人樂善好施嘅精神。工銀亞洲主席兼執行董事高明，噚日就代表大會即席捐贈10萬蚊支票畀明愛總裁閻德龍神父，真正做到企業發展同社會責任共進並行嘅良性循環願景。高小姐仲話，今次賽事用上「悅跑越勇」做主題，係想鼓勵港人，藉賽事繼續發揚挑戰自我、堅韌不拔、永不言棄嘅體育精神。

除咗跑步外，嗰日大會仲安排咗好多遊戲攤位畀市民參與，令成個中環齊齊感受假日super fun，大人細路都玩得咁開心。