群星悼60歲冥壽 Eason加歌紀念陳百強

已故巨星陳百強（Danny）逝世25年，適逢今年是他60歲冥壽，陳奕迅（Eason）、關淑怡、陳慧嫻、盧冠廷及劉美君等一眾歌手，前晚演出《環球高歌陳百強演唱會》，獻唱多首金曲紀念Danny。

大會早前公布的嘉賓名單中，包括上月墮樓身亡的盧凱彤，原定由她演出的部分，改由周殷廷及符致逸演出。至於與陳百強相識多年的林珊珊，負責在台上獨白，分享與Danny之間的小故事。Danny在圈中出名貪靚，盧冠廷唱完《突破》後，自言特意着得靚靚出場：「Danny仔同我講過『如果着得靚唔過我，你就永遠都唔會紅』，佢講得啱，所以我依家要學佢改變！」

關淑怡︰永遠的白馬王子

稍後，盛裝現身的關淑怡唱《煙雨淒迷》及《漣漪》，又大讚Danny說：「我有同過佢同台，我當時係新人，好怕醜。佢喺我心目中係白馬王子，童年回憶嚟！」

壓軸出場的Eason，則唱出《深愛着你》，他坦言心情緊張：「我成日覺得演唱會係一個好好嘅藉口，可以同大家聚首一堂，一齊去享受好正嘅氣氛同感受，好開心可以見到大家。」Eason自爆騷前主動要求加唱一首《再見Puppy Love》，最後與原唱者林珊珊合唱，為演唱會留下完美句號。

撰文︰Pauline

編輯：李潔盈

美術：梁政敏