品嘗全新「荷塘鴨子」午宴 賀香港迪士尼13周年

黛安每年元旦日都會同屋企人去香港迪士尼樂園酒店食自助餐，一班小朋友可以同迪士尼主角見面，吃完又可以沿住海旁行下睇風景，真係好寫意。

黛安昨日就應Linda同Lana邀請，去迪士尼樂園酒店嘅晶荷軒試新菜式—「荷塘鴨子」，呢個以鴨為主題嘅午餐，有前菜、5道主菜同甜品，每道菜都有驚喜。黛安最欣賞係中菜廚師長Ricky Wu十分用心鑽研新嘅烹調方法，其中杞子鴨湯燴荷花，Ricky將鴨殼同芥菜熬湯後，將芥菜膽攪溶造成香濃芥菜鴨湯底，放上切成荷花形狀嘅娃娃菜，可謂色香味俱全。另一道荔枝醬鴨胸肉伴荷香薄餅，最考功夫係個荔枝醬，先將荔枝乾起核，用白酒浸10小時，再用冰糖同桂枝煲12小時製成醬，難度非常高！而甜品就係黃金湘蓮饅頭伴蓮子冬茸冰，冬瓜煮熟後用砂糖浸過夜，第二日再隔水蒸，用蓮子、青檸汁同蜜糖炮製成冬茸沙冰，夏天可凍食，冬天就可熱食。每道菜嘅事前準備工夫都花上一日至數日，食客都感受到師傅嘅用心。Ricky就話，鴨比雞嘅營養價值同蛋白質都高，且容易消化，希望用新煮法帶出新嘅味道。

席間黛安就恭喜Linda同Lana，因為今日係香港迪士尼樂園成立13周年，黛安和其他傳媒朋友都祝樂園繼續客似雲來！Linda話希望高鐵同港珠澳大橋開通後，會帶來增長；之後佢會去武漢、長沙、福州同南寧推廣高鐵旅遊。嚟緊迪士尼櫃位都會進駐高鐵西九龍站，國內旅客只要以QR Code或有支付功能嘅App，就可即時預訂或購買到樂園門票。年底通車嘅港珠澳大橋，由香港口岸坐車去迪士尼只需10分鐘，樂園仲會同大灣區旅行社合作，推點對點行程為旅客提供最佳服務。