馬會國際慈善論壇 猛人雲集

香港賽馬會係全球最大慈善公益機構之一，黛安噚日有幸同馬會慈善事務方面嘅主管食午飯，知道繼2016年後，馬會慈善信託基金喺下周四（20日）會一連兩日喺灣仔會展舉行第二屆國際慈善論壇，屆時精英猛人雲集，包括撰寫《正義︰一場思辨之旅》嘅哈佛大學政治哲學教授Michael Sandel、諾貝爾經濟學獎得主James Heckman、奧運金牌得主「水怪」菲比斯等。

馬會慈善及社區事務執行總監張亮話，今屆主題係解決城市化帶來嘅社會議題，好似Michael Sandel會講下市場經濟下嘅公民道德；James Heckman講向弱勢兒童提供早期發展支援，有助解決貧窮問題、諾貝爾和平獎得主Muhammad Yunus講下點推動基層人士嘅微型貸款運動等。

而贏咗28面奧運獎牌嘅菲比斯，喺體壇退休後成立咗菲比斯基金，以佢自身經歷，鼓勵小朋友以游泳克服恐懼，建立自信，同日仲有大家熟悉嘅姚明，交流下體育同慈善嘅關係。

今次將有逾60名來自世界各地講者同逾千人參與，一般門票$2,500、學生$750，聽聞反應好好，現只剩下小量咋，有興趣要快啲手啦！