黛安
黛安

推互動劇場 18學校巡迴演 銀行公會教理財

發佈時間: 2018/09/13

推互動劇場 18學校巡迴演 銀行公會教理財

香港銀行公會同香港小童群益會噚日舉行「理財互動劇場2018」啟動禮,黛安有幸出席,知道原來今個月至明年1月,互動劇場會搬到全港18間中小學巡迴上演,超過5,000位中小學生有機會參與,用互動同創意方法學習理財態度。

噚日啟動禮有好多高官猛人同場,例如政務司司長張建宗、同多間銀行嘅高層。

張司長喺活動上仲分享理財心得,話自己細細個就有儲蓄習慣,而且好慳,食隔夜餸、波鞋爛咗先買新等,又叫大家唔好做無謂借貸,要量入為出。香港銀行公會主席施穎茵又話,細個同外婆一齊住,會幫外婆周圍格價,養成慳得就慳,唔亂消費嘅習慣,無論賺幾多錢,都要養成儲蓄習慣,佢仲希望透過今年理財互動劇場,培育年輕人建立負責任嘅理財觀念。

渣打香港執行董事兼行政總裁禤惠儀分享,買嘢時最重要分清「需要」同「想要」。中銀香港副總裁龔楊恩慈就話,執屋時成日發現自己買咗未用過嘅嘢,要提醒自己唔好重複消費,減少浪費。啟動禮上,仲率先上演咗一段理財互動劇場,講男主角因先借未來錢買波鞋、遊戲機,搞到晚年一貧如洗。

另外,張司長話,過去1年有逾50間企業向金管局查詢,有意喺香港經營虛擬銀行,估計最快今年底至明年首季可發牌,金管局今個月內就會推出即時跨銀行支付或轉帳服務,畀市民享受金融科技為生活同消費帶來嘅便利。

撰文: 黛安 消息特靈八卦公關
欄名: 八卦名利場