會展30周年 優質服務獲獎無數

會展今年踏入30周年，喺2017/18年度就舉行咗1,061項活動，包括118個展覽、166個國際及本地會議，涵蓋金融、醫藥科學、雲端技術等唔同領域，仲憑住優質服務、環保等方面贏得23個獎項同證書，認真厲害啊！

黛安聽公關姊妹講，喺逾1,000項活動中，出席嘅人次就超過820萬，包括參展商、各行業買家、會議代表、活動訪客、宴會賓客、餐廳顧客，要喺服務、管理各方面做到100%滿意，相信都好花心機。不過佢哋一直迎難而上，喺服務品質、社區服務同環境保護等方面，就贏得23個獎項同證書，包括在「亞洲展覽會議協會聯盟」（AFECA）主辦嘅2017 AFECA大獎中，獲得「最佳場館獎」冠軍等。獲獎絕對係對佢哋嘅認同及鼓勵。

近年鄰近地區嘅會展業競爭激烈，不過會展喺2017/18年度，都爭取到舉辦7個新展覽，同69個新會議，包括Gourmet Asia 2018、中國嘉德香港2017秋季拍賣會、第33屆亞太眼科學術會議、2018年特許金融分析師學會周年大會等。

成績做得咁好，會展管理公司董事總經理梅李玉霞（Monica）就話唔會因此而自滿，會繼續尋求改進機會。黛安都要畀個like佢啊！