黛安
黛安

賞色彩繽紛建築設計 海港城化身大型遊樂園

發佈時間: 2018/09/14

賞色彩繽紛建築設計 海港城化身大型遊樂園

海運大廈露天廣場經常都有藝術品展出,黛安不時都會去「打卡」,海港城下禮拜喺嗰度又有藝術展舉行喇,今次嘅主角係西班牙著名設計師Jaime Hayon,佢用咗色彩斑斕嘅動物做展覽主題,到時一定好色彩繽紛!

海港城舉辦嘅「Jaime Hayon奇想宇宙」將於本月20日至10月17日舉行,展覽分兩部分,第一部分喺海運大廈露天廣場舉行,廣場將會化身大型遊樂園!公關姊妹同黛安講,Hayon將幻想中嘅珍禽奇獸融合喺建築當中,設計出三座形狀趣怪同色彩斑斕嘅建築雕塑,分別有紅色、黃色同埋綠色,雕塑仲內有乾坤,分別有潛望鏡、猴子搖搖板同滑梯,玩味十足。

第二部分展覽就設喺「海港城‧美術館」,展出Hayon特別為今次展覽創作嘅畫作同埋雕塑,包括喺意大利Italo Bosa工作室製作嘅手工陶瓷雕塑《Faunamask》系列同埋《Faunavase》系列,極具收藏價值!

除咗有展覽睇,仲有得見Hayon真人呀!事關佢會喺下周三(19日)會喺馬可孛羅香港酒店舉行首個香港藝術分享會,同大家分享佢嘅創作心得,仲係免費!有興趣嘅朋友可上呢個網址登記參加︰http://www.harbourcity.com.hk

撰文: 黛安 消息特靈八卦公關
欄名: 八卦名利場