青協「天文嘉年華」 親子齊齊探索科學

下星期就係中秋節，大家除咗食月餅同賞月外，黛安知道香港青年協會創新科學中心喺中秋節翌日（25日），會喺鑽石山荷里活廣場舉辦「天文嘉年華」，到時有好多適合親子參加嘅特色天文活動，好似「中秋月球燈製作」、「火星探索任務」、「星空攝影館」同「親子數碼星空之旅」等，最啱一家大細一齊去探索有趣科學啦！

青協好友同黛安講，今次嘉年華嘅「中秋月球燈工作坊」，參加者仲可以親手製作中秋月球燈，深入認識月球呢一顆天然衛星，大家又可以透過「火星探索任務」用第一身視點技術（First Person View）駕駛機械車遙距探索火星，所有活動仲係免費啊！活動門券會喺當日上午11時45分開始派發，派完即止，大家記得早啲去攞呀。