旅發局招募「老友記」義工 推廣香港特色遊

黛安由細到大都鍾意做義工，聽公關姊妹講，旅發局嘅「HK Pals」義工計劃做緊新一輪招募行動，即日起至10月19號，經過培訓後，就可以「老友記」身份，向訪港旅客介紹香港，一盡地主之誼！

姊妹話，旅發局「HK Pals」義工計劃今年踏入10周年，義工團隊有近80人，其中4分1成員由計劃開始到依家都有參與，一齊度過咗10年歲月，就好似一個大家庭咁，實在好有愛！

黛安聽講其中唔少義工都臥虎藏龍，有退休享受人生嘅朋友，又有嚟自唔同行業嘅打工仔，包括醫護人員、政務主任、空中服務員等。大家都想喺工作之外，幫香港出一分力。

想成為一分子？好簡單，只要年滿18歲或以上嘅香港居民、性格開朗、熱愛香港、願意為旅客提供服務、對旅遊有關範疇有豐富認識、可以講流利廣東話、英語、普通話或其他語言，就可以報名啦！姊妹仲話，成員都經過嚴格挑選，所以有兩輪面試，成功通過就安排一系列培訓，由深度體驗活動，例如探索特色小區，率先到訪全新景點，至學習溝通技巧，正式成為「老友記」向旅客介紹香港。

做「老友記」其實都唔簡單㗎，需要輪更工作，一般服務地點會安排喺尖沙咀天星碼頭、山頂露天廣場、香港國際機場等嘅旅客諮詢中心，又或大型活動場地，工作時間一般為每日早上9點至下午6點，每節服務時間3小時，「老友記」要喺一年任期內完成唔少於20節、即60小時嘅服務，每節服務都會有135元津貼。

黛安已經報咗名，快點來參加啦！http://www.discoverhongkong.com/tc/about-hktb/hktb-and-the-community/hong-kong-pals.jsp。