黛安
黛安

文化出版界名人雲集 賀聯合集團30周年

發佈時間: 2018/09/21

文化出版界名人雲集 賀聯合集團30周年

閱讀使人增長知識,豐富涵養。黛安知道今年適逢係聯合出版集團迎來30周年,前日(19日)舉行嘅祝賀酒會上廣邀咗500位社會賢達出席,特首林鄭月娥都有到場,佢仲話以前成日帶囝囝去三聯同商務印書館「打書釘」,體會到閱讀對提升社會競爭力好緊要,所以政府今年都推出咗全民閱讀運動。聯合集團都好配合,推出咗低收入家庭捐贈書券,同門市回收舊書轉贈計劃,希望社會大眾都感受到書香之美。

黛安喺酒會遇到唔少文化同出版界嘅前輩,仲撞番已退休嘅知名話劇導演毛俊輝(毛sir),同埋前聯合出版集團副董事長兼總裁陳萬雄。作為業界重量級猛人,兩位前輩話依家仲忙過以前,過去係因為為工作,所以係「事忙」,依家退休之後,做自己開心嘅事,所以係「閒忙」。好似毛Sir就忙住編排話劇,陳萬雄博士忙住周遊列國同寫書,真正退而不休。

而出過唔少暢銷書嘅作家李韡玲(Ling姐),嗰晚都好受歡迎,唔少出版人都爭住一齊合照「打卡」留念,黛安當然都有影番張合照啦。

撰文: 黛安 消息特靈八卦公關
欄名: 八卦名利場