馬會國際慈善論壇 諾貝爾學者大談政經

今時今日大家都講環保，黛安就知道香港賽馬會舉辦、噚日揭幕嘅國際慈善論壇，其中一個議題就係可持續發展，大會亦配合環保主題，向每位入場人士派發環保水杯1隻，現場亦只設水機，不派膠樽裝水，響應「循環再用」潮流，唔少與會者都讚好！

講開呢個論壇，其實係亞洲區入面第一個聚焦城市社會議題嘅國際慈善論壇，有超過1,000位思想領袖同各界代表出席撑場，講者更係嚟自世界各地超過60人，猛人雲集。好似噚日就請嚟諾貝爾經濟學獎得主James Heckman教授演講，佢仲大談中美貿易戰，話無充分理據支持，最後只會令美國競爭力下降。

至於諾貝爾和平獎得主Muhammad Yunus，更非常親民，唔單止為現場記者簽名，仲分享破格想法。佢話，「失業」係「人為問題」，而「打工」係「偽概念」，其實每個人都可做「老闆」，運用天賦改變社會，更鼓勵在場記者即刻辭職，真係智慧同幽默感都100分！