ViuTV大型選秀節目《全民造星》成功掀起全城熱話，可愛小鮮肉姜濤不但深得觀眾喜愛，絕對是冠軍大熱人選；更有傳聞指三間唱片公司對姜濤青睞有加，爭相希望與他簽約，相信比賽過後仍能看到姜濤的身影活躍在娛圈！人氣爆燈的姜濤，原來帥氣背後竟然暗藏騎呢性格！
在前晚播出的《全民造星》，監制花姐玩大踢爆，姜濤「榮登」她心目中最騎呢的選手！花姐直言：「我初初見佢好靚仔，咁個人當堂醒一醒，跟住佢又成日發夢，叫佢行左佢又走去右邊。表面上又好似好聽你話，你鬧佢佢會聽你話，但轉頭又唔理你。我話晒都係至高無上嘅監制，佢都唔理我，你話佢係咪騎呢吖！」姜濤笑住聽花姐點評自己，然後不假思索辯駁：「我只係難捉摸啫。」
有參賽者再爆料，姜濤有鋪「照鏡癮」，經常在拍攝中途突然照鏡，連經過任何反光的東西都要照鏡！姜濤當然有自己一套解釋：「呢啲做藝人好基本嘅嘢。」花姐即時反問：「咁你坐喺度咁耐（錄節目），無得照鏡咪好慘囉。」唔好以為姜濤忍得住，佢自爆：「所以頭先一放（小休）已經衝咗去……」見大家笑得開心，姜濤再自爆：「我隻手錶其實唔充電，就係因為我可以反光睇到自己個樣。」花姐再追問，如果這世上再沒有鏡子怎麼辦，姜濤亦有妙計：「有水，可以睇倒影架嘛。」完全明白點解花姐覺得姜濤騎呢！
有睇開《全民造星》的觀眾，相信一定記得姜濤辛苦減下60磅才有今日靚仔樣。姜濤坦言驚自己入行後會復胖，所以把握機會望多兩眼。原來姜濤本身好為食，他曾經講過：「民以食為天呀，有咩緊要得過食呀！我保證，我廿歲或者廿一歲之前做唔到偶像，你哋幾年之後見我，一定唔會係呢個樣，實會變返做肥仔！」姜濤講講吓仲話自己呢幾年攰喇，語無倫次搞到大家一頭霧水，更突然當眾呼籲：「大家一定要珍惜我呢個樣！」各位粉絲，考驗真愛時間到了，如果姜濤變回200磅肥仔，大家還會繼續支持他嗎？