賞燈好去處 利東街中港城7米月兔迎中秋

今日係中秋佳節，夜晚當然要去賞燈啦。黛安知道，今年好多商場絞盡腦汁，推出咗唔同精采展覽同活動，希望大家過個愉快、溫馨嘅中秋。

聽公關姊妹講，利東街同中港城，就喺即日起至10月17號，打造咗「月兔．秋燈」主題展覽，聯乘國際著名澳洲藝術家Amanda Parer，展出10隻唔同趣致造型、有高達7米嘅巨型發光月兔，睇見都想去打卡啊！姊妹話，23至25號仲有「人約利東‧中秋慶典」，利東街會舉辦民間技藝市集，包括燈籠紮作、木偶戲曲、吹糖等，中港城亦有LED火龍巡遊，等大家感受傳統中秋慶典係幾咁熱鬧。

而新地旗艦商場apm，今年就有「奇幻藝術花燈展」，分咗四個主題區，包括有3朵15呎嘅巨型花燈裝置、30呎鬱金香浪漫花海、數碼互動許願花燈池、潮流美味市集，就算行商場都可感受中秋氣氛。

仲有荃灣廣場特別以「Fly Me to the Moon星月幻想曲」，打造4大星空月夜主題裝置，亮點之一係以超過15,000粒LED燈編織而成嘅18米星空隧道，同埋好似童話咁浪漫嘅月光星湖同夢幻兔花園，啱曬同摯愛好友影相放喺IG、fb！公關姊妹話，只要like荃灣廣場fb，或follow IG就可獲得「星月願賞」禮品1份；即日起至11月29號，係場內消費滿100元，仲可換領荃灣廣場百老滙戲院半價電影戲票優惠券啊！