復康會×八達通 助輪椅人士融入社區

輪椅使用者對於點對點無障礙交通需求殷切，黛安知道八達通卡有限公司（八達通）同香港復康會（復康會）合作，自2014年推出「八達通復康交通資助計劃」，透過「易達轎車」為低收入輪椅使用者提供點對點無障礙交通服務，除方便佢哋日常去醫院覆診，仲可參加社交活動，計劃原本為期3年，現已延長至今年12月啦。

據黛安所知，有關計劃由「八達通慈善撥款」捐出730萬元，現時參與計劃嘅會員有2,760人；而「易達轎車」可同時容納2名輪椅使用者同2名家人乘坐，等照顧者及親友可結伴同行，真係好貼心啊。

其中一位會員陳重之，患小兒麻痹症，自幼需以輪椅代步。佢同黛安講，自從2年前開始用「八達通復康交通資助計劃」，可同親友一齊去香港唔同地方，近日就參加咗由八達通及復康會為計劃會員及其照顧者舉辦的「愛心同行拉闊生活系列@大笑過中秋」，仲玩得好開心！