海港城7-Eleven新店 日本直送獨家輕食

出街行行下口渴、肚仔餓，黛安都一定會入7-Eleven睇下有乜可以醫肚。最近發現黛安最愛嘅「蒲點」海港城，上星期三（19日）啱啱開咗7-Eleven新店，唔單止夠晒大，行得舒服，產品種類仲非常多元化，有齊多款由日本直送嘅獨家7-PREMIUM輕食，又有日本直送甜品、人氣杯麵同零食揀，真係睇見都心花放。

除咗零食，店內仲有日式湯烏冬、關東煮等熱食提供，最平11蚊起有得食；想飲番杯日本溫室蜜瓜鮮果汁，計落都係32蚊杯。公關姊妹仲同黛安報料，原來即日起至10月2日，喺海港城新店仲有限時開幕優惠㗎，買滿50蚊即減5蚊，唔掃多啲零食都對唔住自己。

另外，大熱嘅期間限定Daily Café鹽漬櫻花味鮮奶咖啡，都係10蚊杯，見客前飲番啖夠晒醒神。黛安最推介嘅，梗係期間限定嘅芒果味新地雪糕，啖啖北海道5.0牛乳都係10蚊一杯，你話點可以唔秒速入手呢。