十八樓C座「入伙」50年 紀念郵票滿載香江情懷

商業電台長壽廣播劇「十八樓C座」，今年踏入50周年啦！劇中周老闆、祥嫂等角色，不但道盡基層小市民心聲，仲係一部「香港簡史」，借住諷刺時弊記錄低香港發展嘅一點一滴，真正「50年不變」。商台姊妹都特登送咗套紀念郵票畀黛安，一套12款郵票唔單止印晒劇中「幕後功臣」播音員嘅真貌，仲有每個角色嘅經典對白，好似祥嫂嘅「我係後欄皇后」、孤寒鐸嘅「我份人知書識禮」，真係睇見都覺得「有聲㗎！」

呢套郵票仲有用商台喺荔枝角嘅舊址同廣播道現址嘅相做設計，收藏價值真係滿分。黛安都喺度祝商台節目可秉承傳統，繼往開來，持續發揚香港之光啦。