袁詠儀與張智霖貴為圈中模範夫妻，經常大晒恩愛，弊在Chilam實在太型英帥靚正，不時惹來狂蜂浪蝶，緋聞不絕，更有傳當年Chilam與佘詩曼合作拍劇，搞到靚靚要親自監場，可見Chilam異性緣有幾勁！
情敵當靚靚隱形
而靚靚近日作客《viuTV》節目《大星講》，親口承認不少與Chilam合作過的女拍檔都為他意亂情迷，靚靚為宣示主權，更曾陪老公開工親自監場，點知竟然
有情敵當她隱形，靚靚憶述當日情況依然句句有骨：「佢直頭唔當我存在，我企喺隔離，佢直行直過當我透明，齋同Chilam打招呼，我明白佢係真情流露，因為實在太鍾意（Chilam），不過我覺得Chilam都有責任，應該即場介紹呢位係我老婆！每次有呢啲飛來蜢出現，我會即刻同佢討論，佢亦覺得瞞唔到我。」
情敵送湯水 Chilam與靚靚分享
靚靚又透露有人更曾施展愛心湯水攻勢，為Chilam煲湯水，但Chilam卻覺得沒有問題，還拿回家中分甘同味，令靚靚不知好嬲定好笑。眼見老公如此受歡迎，靚靚除了做跟得夫人，更大方承認曾經檢查Chilam手機：「我試過check佢電話，出於好奇心麻，係咁叮叮叮響，邊個嚟架？但佢唔想咁，佢覺得咁樣無意思，代表你唔信我。」
歸咎Chilam太幽默
其實身為藝人，拍劇時難免遇上愛情戲份，隨時可能與對手日久生情，而靚靚亦透露Chilam同樣是緊張大師：「其實我老公都好擔心我，成日打嚟check我喺邊，但我feel呢啲嘢好犀利，只要我一知道有人對我有意思，我會即刻法官上身，好清晰話畀對方知，我唔會畀任何人有機會有遐想，我成日同老公講又唔見我有呢啲情況，因為你太過幽默呀！」不僅帥氣，還要幽默，懂得逗人開心，難怪Chilam如此受歡迎啦！