小母牛「競跑助人2018」 跑出無「窮」新希望

香港人向來積極參與「慈善跑」，而黛安期待已久嘅香港小母牛年度大型籌款盛事「競跑助人」又嚟喇，更開始咗接受報名！今年有好多星級運動員跑手參賽，包括兩屆亞運體操金牌得主石偉雄、分別勇奪2018年亞運壁球個人及團體賽金牌嘅歐詠芝同埋歐鎮銘、仲有里約奧運游泳代表江忞懿同鄭莉梅。

黛安知道，活動今年11月喺白石角海濱長廊舉行，收益會撥捐小母牛喺內地偏遠地區嘅扶貧項目，包括幫助貧困家庭。今年賽事除咗保留「個人10公里長跑賽」、「3公里家庭愛心跑」、「3公里團體愛心跑」同埋「1公里x5團體接力賽」外，仲會新增「企業／機構10公里團體長跑賽」。大會仲安排一連串免費活動，包括「小母牛神奇特工」互動遊戲同埋臉部彩繪。

另外，優先報名參加10公里同埋3公里嘅跑手，仲會得到全套10件限量紀念品，包括獎牌同埋電影小食套票！至於完成「3公里愛心跑」嘅參加者都可獲贈獎牌。每個賽事組別都設冠、亞、季軍同多個獎項，好似「最高籌款隊伍」、「最高個人籌款」同「最高參與機構」。團體組參加者就可以競逐「小母牛神奇特工造型獎」贏獎品。想了解詳情可瀏覽網頁︰http://www.racetofeed.org.hk。