馬時亨捧囡囡場 支持馬會品格日

廣深港高鐵香港段啱啱順利通車，一直坐鎮西九龍站指揮大局嘅港鐵主席馬時亨（Frederick）非常忙碌，但噚日黛安仍喺九龍灣撞見Frederick出席「賽馬會『品格傳城』計劃-2018香港品格開幕禮」。

原來今次活動搞手正係馬時亨囡囡劉馬露明，作為廿四孝爹哋，馬生梗係帶埋太太捧場，加上佢都做過第一屆品格日大使兼係教育大學校董會主席，宣揚教育當然義不容辭。

身為品格教育協會創辦人及主席嘅劉馬露明話，過去2年有23萬人參加過協會嘅活動，今年搞到第3屆，更首度獲馬會慈善及信託基金贊助，以便未來2年繼續做推廣同教育。佢仲引述偉人馬丁‧路德金嘅名言︰「智慧、知識及品格，才是真正嘅教育」，希望大家要正視品格教育。黛安仲見到馬會慈善及社區事務執行總監張亮、教育局局長楊潤雄、「要有光」嘅創辦人余偉業都有到場，陣容咁鼎盛，一定「講得出，教得好」嘅。