《全民造星總決賽》下月殺到 超人氣姜濤唔驚輸

ViuTV選秀真人騷《全民造星》成為熱話，引來網民瘋狂討論，當中19歲「嫩版彭于晏」姜濤最受注目。《全民造星總決賽》下月舉行，姜濤日前接受本報專訪，笑言得到大眾支持，就算輸了亦會當「贏」。

《全民造星總決賽》將於下月14日假九龍灣國際展貿中心舉行，屆時ViuTV和網上平台會現場直播。除了星級評判及專業評判佔一半評分外，更加入全民投票，亦佔一半評分，投票期由今日至決賽日節目內時段結束，實行一人一票選出冠軍。

早前10強參賽者已完成美國集訓，姜濤坦言希望勝出比賽，但專心表演最重要︰「起碼做咗一場自己鍾意嘅表演，就算輸都唔會有遺憾。」他認為到了比賽最後一次表演，不可只為贏冠軍而做︰「有咁多人支持，我已經覺得好好彩；咁我就做一個表演，令支持我嘅人唔會失望。」

認同靚仔有優勢

因外貌酷似彭于晏，令姜濤狂吸大量女粉絲，他曾表明「唔想靠樣」，希望用實力證明自己，不過他經歷美國集訓後已改變想法。「無可否認，我行到依家都有一定嘅外表因素，呢樣嘢有咗就要更珍惜，同時彌補自己不足嘅地方。」

他坦言做藝人要承受輿論壓力，但無阻他成為藝人的夢想︰「有得必有失，無嘢係perfect，無一樣嘅嘢係唔辛苦，我覺得值得。」

撰文︰李詩慧

編輯︰李潔盈

攝影︰林良明

美術︰顏玉玲