美酒佳餚巡禮十周年 歎米芝蓮十星晚宴

美酒佳餚巡禮唔經唔覺已踏入十周年，旅發局總幹事劉鎮漢（Anthony）噚日就請咗黛安去文華東方酒店試菜，率先品嘗將於下月27日美酒佳餚巡禮期間舉行嘅「品味館」米芝蓮十星晚宴菜式。旅發局仲話，呢個晚宴因為只有百幾個位，次次都好搶手。

講番晚宴菜式，頭盆係文華東方酒店米芝蓮兩星食府Pierre嘅「耶路撒冷菊芋沙律」，用咗秋季食材製作，非常清新醒胃；之後就係文華東方扒房大廚Robin Zavou主理嘅「帶子喇沙」，唔止喇沙夠香濃惹味，大廚仲選用咗地道薑花入饌，黛安聞到陣陣花香，聽大廚講，原來薑花係來自大嶼山一位女士種植，非常本土。

跟住就到中菜文華廳嘅黃永強師傅嘅作品「文華鮑魚雞煲」，黃師傅話用晒地道食材，包括泰安雞、大澳虎蝦乾、流浮山蠔油等，配合埋南非鮑魚，絕對不負米芝蓮一星嘅美譽，最後更有椰糖楊枝甘露，為這頓米芝蓮餐畫上完美句號。

7位名廚 製作8道佳餚

整個米芝蓮十星晚宴將有8道菜式，除咗2位文華東方酒店名廚外，仲有5位訪港名廚，好似來自台灣嘅林正青，係台北喜來登大飯店米芝蓮2星食府「請客樓」嘅大廚，佢嘅名菜「冰糖蓋子頭」，話說係用咗豬嘅膝頭肉來煮，特別美味。呢個十星晚宴每位$1,888，配酒加$450；另10月28日仲有同樣係文華東方酒店呈獻嘅萬聖節下午茶，每位$690，10月3日就可以訂位。另外，今年仲推出十周年限量Lucaris酒杯，只要買$800「Perfect 10」品酒證就有得送。